就我觀察
好多看似支持抗爭甚至616出過嚟遊行
但罷工就推極都推唔郁嘅人
問題唔係在於佢哋「和理非」
而係佢哋一直都好抽離，冇當過自己係「抗爭者」
所以當勇武抗爭者痛罵「和理非」時，佢哋無動於衷，完全唔覺得係鬧緊自己
抗爭係「抗爭者」嘅事，而佢哋只係「支持民主」嘅「市民」
佢哋或許唔會怪責抗爭者破壞黨鐵、堵路、放火，甚至可能會因對抗爭嘅見解同人爭論，但就從未打算要去到行動上嘅「參與」，因為佢哋當自己係「局外人」
好多抗爭者可能會不解呢啲人明明清醒，但竟然繼續做free riders
因而怨恨、鄙視佢哋
事實上我亦有時對呢類人感到無奈
但要推動呢場抗爭發揮更大力量（如：真·三罷）
就要努力令更多人成為「抗爭者」
可以係先由好細微好簡單嘅行動開始，例如幫手印文宣、籌備基本物資等
鼓勵佢哋參與多啲，令佢哋明白抗爭有唔同崗位（唔係一嚟就要上前線），幫佢哋搵到合適崗位，加入「抗爭者」嘅行列
呢件事係好需要耐性
呢類人係要人推先會郁，推十下都可能只會郁一下，甚至推一百下都未必肯郁
但如果成功將一個人由抽離嘅「旁觀者」轉變為參與實際行動嘅「抗爭者」
逐漸佢哋就有可能愈來愈願意付出，因為「示威人士」嘅身份會喺佢哋心中轉變為「手足」，每一個抗爭行動亦唔再只係電視上嘅畫面，而係佢哋生活嘅一部分
正如大家都聽唔少例子係一開頭只做「和理非」嘅手足愈走愈前，就係因為持續地參與抗爭，只會令人愈來愈投入，並發掘到自己之於群體嘅價值，唔輕易因爲恐懼同孤獨而逃避責任
大家不妨喺身邊揀定一兩個目標人物，嘗試將佢哋拉入抗爭大隊，人愈多，無論三罷也好其他行動也好，都會愈大勝算
Search